विराटनगर । विराटनगर महानगरपालिका वडा नं.८ स्थित अशोक चोक पूर्व सडक छेउमा हिन्दु र मुस्लिम समुदायका अगुवा तथा युवाहरूले संयुक्त रूपमा वृक्षारोपण गरेका छन् । केही समयअघि सोहि वडाको वलुवाइ भन्ने स्थानमा एउटा पिपलको रुख काटिएपछि सुरु भएको विरोध र विवादलाई सकारात्मक सन्देश दिँदै दुवै समुदायका व्यक्तिहरूले वृक्षारोपण गरेका हुन् ।
विराटनगर वडा नं. ८ को संयोजनमा आयोजित उक्त कार्यक्रममा १५ वटा वर र पिपलका विरुवाहरू रोपिएका छन् । वातावरणीय सन्तुलन र धार्मिक आस्थासँग जोडिएको पिपलको रुख काटिएपछि स्थानीय अभियन्ताहरूले त्यसको विरोध गर्दै आएका थिए । सोही स्थानमा नयाँ विरुवा रोपेर प्रकृति संरक्षणको अभियानलाई अगाडि बढाइएको हो ।
वृक्षारोपण कार्यक्रममा बोल्दै वडा अध्यक्ष पोख्रेलले पिपलको रुख काटिएको खाली स्थानमा अब वडा कार्यालयले खुल्ला व्यायामशाला निर्माण गर्ने जानकारी दिए । उनले विकास र वातावरणलाई सँगसँगै लैजाने योजना रहेको बताए ।
कार्यक्रममा सहभागी विराटनगरका अगुवा वासिम आलमले रुख–विरुवाको कुनै जात वा धर्म नहुने उल्लेख गर्दै यसबाट हुने फाइदा सबैलाई समान हुने बताए । ‘रुखले अक्सिजन दिँदा जात हेर्दैन, त्यसैले रुख रोप्दा सबैलाई फाइदा पुग्छ,’आलमले भने, ‘तर विरुवा रोप्नु मात्र ठूलो कुरा होइन, यसलाई हुर्काउन र संरक्षण गर्न पनि हामी सबै उत्तिकै जिम्मेवार हुनुपर्छ ।’
धार्मिक र सामाजिक सद्भाव झल्किने गरी गरिएको यस वृक्षारोपण कार्यक्रममा स्थानीय युवा, सामाजिक अभियन्ता र बुद्धिजीवीहरूको उल्लेख्य सहभागिता रहेको थियो । रोपिएका विरुवाहरूको संरक्षणका लागि स्थानीय तह र समुदायले विशेष ध्यान दिने प्रतिबद्धता समेत जनाइएको छ ।
