विराटनगर।हाल देशभर मनसुनी वायुको प्रभाव सक्रिय रहेको जल तथा मौसम विज्ञान विभाग, मौसम पूर्वानुमान महाशाखाले जानकारी दिएको छ। मनसुनको न्यून चापीय रेखा पश्चिमतर्फ सरदर स्थानको आसपास र पूर्वतर्फ सरदर स्थानभन्दा उत्तरमा अवस्थित रहेकाले मौसममा सक्रियता देखिएको हो।
महाशाखाका अनुसार हाल देशभर सामान्यतया बदली रहेको छ। गण्डकी, लुम्बिनी र सुदूरपश्चिम प्रदेशका केही स्थानमा हल्का वर्षा भइरहेको जनाइएको छ।
दिउँसो सुदूरपश्चिम प्रदेश लगायत देशका पहाडी भू-भागका धेरै स्थानमा तथा तराईका केही स्थानमा मेघगर्जन र चट्याङसहित मध्यम वर्षाको सम्भावना रहेको छ। बाग्मती प्रदेशका पहाडी भू-भागमा भने एक–दुई स्थानमा भारी वर्षा हुने सम्भावना पनि रहेको छ।
रातिको समयमा देशका पहाडी भू-भागमा सामान्यतया बदली रहनेछ भने तराई भू-भागमा आंशिक बदलीको अवस्था रहनेछ। पहाडी क्षेत्रका केही स्थान तथा तराईका एक–दुई स्थानमा मेघगर्जन र चट्याङसहित वर्षा हुन सक्ने पूर्वानुमान गरिएको छ।
कोशी, बाग्मती र गण्डकी प्रदेशका पहाडी क्षेत्रका एक–दुई स्थानमा भारी वर्षा हुने सम्भावना रहेकाले महाशाखाले सर्वसाधारण तथा सरोकारवाला निकायहरूलाई आवश्यक सतर्कता अपनाउन र मौसमसम्बन्धी पछिल्ला सूचनाको नियमित जानकारी लिन अनुरोध गरेको छ।
