विराटनगर । झापा इनर्जी लिमिटेडले आज (साउन १४ गते) देखि प्रारम्भिक सार्वजनिक निष्कासन (आईपीओ) प्रक्रिया सुरु गरेको छ। कम्पनीले आफ्नो सौर्य विद्युत् आयोजनाको आसपासका स्थानीय बासिन्दा तथा वैदेशिक रोजगारमा रहेका नेपाली नागरिकहरूलाई प्राथमिकता दिँदै साधारण शेयर निष्कासन गरेको हो।
आयोजना प्रभावित क्षेत्रका लागि ३ लाख ८० हजार कित्ता शेयर
कम्पनीले आफ्नो कुल जारी पूँजी ३८ करोड १ लाख ९० हजार रुपैयाँको १० प्रतिशत हिस्सा, अर्थात् ३ करोड ८० लाख १९ हजार रुपैयाँ बराबरको साधारण शेयर आयोजना प्रभावित क्षेत्रका स्थानीय बासिन्दाका लागि निष्कासन गरेको हो। यस अन्तर्गत कुल ३ लाख ८० हजार १९० कित्ता शेयर छुट्याइएको छ।
शेयर वितरण यस प्रकार गरिएको छ:
१ लाख ९० हजार ९५ कित्ता — सौर्य आयोजना निर्माणस्थल शिवसताक्षी नगरपालिका वडा नं. ४ र त्यस वरपरको १०० मिटर भित्रका बासिन्दाका लागि
१ लाख ९० हजार ९५ कित्ता — वडा नं. ४ का अन्य क्षेत्रका बासिन्दाका लागि
वैदेशिक रोजगारीमा रहेका नेपालीका लागि छुट्टै अवसर
नेपाल सरकारबाट श्रम स्वीकृति प्राप्त गरी विदेशमा कार्यरत नेपाली नागरिकका लागि कम्पनीले ५७ हजार २९ कित्ता शेयर निष्कासन गरेको छ। यसका लागि कुल ५७ लाख २ हजार ९०० रुपैयाँ बराबरको पूँजी छुट्याइएको हो।
आवेदन प्रक्रिया र समयसीमा
न्यूनतम आवेदन: १० कित्ता
अधिकतम आवेदन: ५,००० कित्ता
स्थानीय बासिन्दाका लागि आवेदन म्याद:
छिटोमा: साउन २८ गते
ढिलोमा: भदौ १२ गते
वैदेशिक रोजगारमा रहेका नेपालीका लागि आवेदन म्याद:
छिटोमा: साउन १८ गते
ढिलोमा: साउन २८ गते
आयोजना विवरण
झापा इनर्जी लिमिटेडले सञ्चालनमा ल्याएको ग्रीड–जडित १० मेगावाट क्षमताको सौर्य आयोजनाको कुल लागत ८७ करोड ९० लाख रुपैयाँ रहेको छ। यस अनुसार प्रतिमेगावाट लागत ८ करोड ७९ लाख रुपैयाँ परेको हो।
विद्युत उत्पादन अनुमतिका हिसाबले आयोजना सञ्चालनका लागि अझै २२ वर्ष बाँकी रहेको कम्पनीले जनाएको छ।
लगानी फिर्ता हुने अनुमानित अवधि:
इक्विटी आधारमा:
साधारण रूपमा: ९.५५ वर्ष
डिस्काउन्टमा: १३.४६ वर्ष
परियोजना आधारमा:
साधारण रूपमा: ८.०६ वर्ष
डिस्काउन्टमा: १५.६६ वर्ष
आवेदन दिने स्थान
स्थानिय बासिन्दा: हिमालयन बैंकका दुधे, दमक र सुरुङ्गा शाखा तथा आयोजनास्थलमै आवेदन दिन सकिनेछ।
वैदेशिक रोजगारीमा रहेका नेपाली: नेपाल धितोपत्र बोर्डबाट स्वीकृत सम्पूर्ण सी-आस्बा सदस्य बैंक तथा वित्तीय संस्थाहरूमार्फत अनलाइन आवेदन दिन सकिनेछ।
निष्कासन तथा बिक्री प्रबन्धक
शेयर निष्कासन तथा बिक्री व्यवस्थापनको जिम्मेवारी हिमालयन क्यापिटल लिमिटेडले लिएको छ।
