विराटनगर । संघीय संसदको उपसभामुख इन्दिरा राना मगरलाई हटाउने तयारी गरिरहेको सत्तारुढ गठबन्धन दल नेकपा एमाले र नेपाली कांग्रेसले कोशी प्रदेश सभाका सभामुख अम्बरबहादुर विष्टलाई पनि हटाउने तयारी गरेको आशङ्का विपक्षीहरूले गरेका छन् । कोशी प्रदेश सभाको बुधबार बसेको बैठकको शून्य समयमा बोल्दै माओवादी केन्द्रका सांसद गणेश उप्रेती ‘सुशील’ले कोशीका सभामुख विष्टलाई पनि हटाउन ‘बन्द कोठा’मा तयारी भइरहेको दाबी गरे ।
‘म गठबन्धनलाई प्रश्न गर्न चाहन्छु । हिजो के भनेर कांग्रेस र एमालेकै सहमतिमा यहाँको सभामुख नियुक्ति गरियो ? अहिले उहाँहरू फेरि यहाँको सभामुखलाई पनि हटाउन बन्द कोठाभित्र छलफल गरिरहेको र मिडिया ट्रायलका लागि समाचारहरू बाहिर आइरहेका छन् । के आधारमा तपाईंहरूले यस्तो गरिरहनु भएको छ ?,’ उप्रेतीले भने, ‘कारणैविना माथिको उपसभामुख र यो प्रदेशको सभामुखलाई हटाउनका लागि किन पहलकदमी चालिरहेका छन् ? म यसको घोर भर्त्सना गर्न चाहन्छु ।’
