विराटनगर। मोरङको कानेपोखरीमा भएको दुर्घटनामा प्रहरी सहायक हवल्दारको मृत्यु भएको छ। शनिबार राति ८ बजेतिर कानेपोखरी गाउँपालिका–७ डाँस खोला पुलको डाइभर्सनमा मोटरसाइकल दुर्घटना हुँदा ३१ वर्षीय जितेन्द्र चौधरीको मृत्यु भएको हो।
प्र –०२–०४३ प २४७१ नम्बरको मोटरसाइकलमा छोरा र श्रीमतीसहित उनी पथरीबाट कानेपोखरीतर्फ आउँदै थिए। डाइभर्सनमा अनियन्त्रित भई दुर्घटना भएको प्रहरीले जनाएको छ।
गम्भीर घाइते चौधरीको मदन भण्डारी अस्पताल तथा ट्रमा सेन्टर उर्लाबारीमा उपचार हुँदै गर्दा मृत्यु भएको इलाका प्रहरी कार्यालय पथरीका डीएसपी मोहनबिक्रम दाहालले जानकारी दिए।
बेलबारी नगरपालिका–४ घर भएका चौधरी प्रहरी चौकी जमुना इलाममा कार्यरत थिए। दुर्घटनामा उनकी श्रीमती प्रहरी चौकी जमुना इलाममै कार्यरत २६ वर्षीया प्रहरी जवान बिमला धिमाल चौधरी र दुई वर्षीय छोरा जेशन चौधरी गम्भीर घाइते छन्। उनीहरुको नोबेल मेडिकल कलेज विराटनगरमा उपचार भइरहेको छ।
