काठमाडौं । मेडिकल व्यवसायी दुर्गा प्रसाईं लाई अनुसन्धानका लागि चार दिन हिरासतमा राख्न प्रशासनले अनुमति दिएको छ।
काठमाडौंका प्रमुख जिल्ला अधिकारी ईश्वर राज पौडेल ले सार्वजनिक शान्ति सम्बन्धी मुद्दामा अनुसन्धान गर्न प्रहरीलाई उक्त अनुमति प्रदान गरेका हुन्।
जिल्ला प्रहरी परिसर काठमाडौँ का अनुसार प्रसाईंविरुद्ध सार्वजनिक शान्ति भंग गरेको तथा अफवाह फैलाएको आरोपमा अनुसन्धान अघि बढाइएको छ। उनी राष्ट्र, राष्ट्रियता, धर्म, संस्कृति तथा नागरिक बचाउ अभियान सञ्चालन गर्दै आएको राष्ट्र राष्ट्रियता धर्म संस्कृति नागरिक बचाउ महाअभियान का संयोजकसमेत हुन्।
प्रहरीले प्रसाईंलाई सोमबार साँझ भक्तपुरबाट पक्राउ गरेको जनाएको छ। परिसरका एसपी पवन भट्टराईले रातोपाटी सँग कुरा गर्दै सार्वजनिक शान्ति सम्बन्धी कसुरसँगै अफवाह फैलाउने विषयमा समेत अनुसन्धानका लागि प्रशासनबाट म्याद लिइएको जानकारी दिए।
प्रसाईंले सरकारसँग भएको सम्झौता कार्यान्वयन नभए अनिश्चितकालीन बन्द गराउने तथा निर्वाचन अवरुद्ध पार्ने चेतावनी दिँदै आएका थिए। यसअघि पनि उनी माघ २३ गते पक्राउ परेर हाजिर जमानीमा रिहा भएका थिए। त्यतिबेला निर्वाचन सम्बन्धी अभिव्यक्तिलाई आधार बनाएर प्रहरीको साइबर ब्यूरोले बयान लिएको थियो।
यसअघि माघ ५ गते पोखराबाट समेत पक्राउ परेका प्रसाईं सो घटनामा पनि पछि रिहा भएका थिए।
