बिराटनगर। 
नेपालमा पश्चिमी वायुको प्रभाव कायमै रहेकाले आज (मंगलबार) देशका विभिन्न स्थानमा वर्षाको सम्भावना रहेको मौसम पूर्वानुमान महाशाखाले जनाएको छ ।
महाशाखाका अनुसार कोशी, बागमती, गण्डकी, लुम्बिनी, कर्णाली र सुदूरपश्चिम प्रदेशका पहाडी तथा हिमाली भू–भागमा चट्याङसहित हल्का वर्षा हुन सक्ने अनुमान गरिएको हो । लुम्बिनी प्रदेशको तराईका एक–दुई स्थानमा पनि हल्का वर्षा हुन सक्ने बताइएको छ ।
मंगलबार दिउँसो र राति देशका धेरैजसो स्थानमा सामान्यदेखि आंशिक बदली रहनेछ । उच्च हिमाली क्षेत्रमा हल्का हिमपातको सम्भावना पनि रहेको महाशाखाले जनाएको छ । चट्याङ पर्ने सम्भावना भएकाले खुला स्थानमा काम गर्ने र यात्रा गर्नेहरूले सतर्कता अपनाउनुपर्ने सुझाव मौसमविद्हरूले दिएका छन् ।
