विराटनगर। अभिनेता दयाहाङ राई निर्देशक माओत्से गुरुङको नयाँ चलचित्र ‘पेन्सनपट्टा’ मा अनुबन्धित भएका छन्। निर्देशक गुरुङकै निर्देशनमा बन्ने यो चलचित्रमा दयाहाङको यो दोस्रो सहकार्य हो। यसअघि गुरुङको निर्देशनमा बनेको डेब्यु फिल्म ‘दयारानी’ मा पनि दयाहाङले मुख्य भूमिका निर्वाह गरेका थिए।
‘पेन्सनपट्टा’ को छायांकन आगामी तेस्रो साताबाट सुरु हुने निर्माणपक्षले जनाएको छ। चलचित्रले भूतपूर्व लाहुरेको कथा प्रस्तुत गर्नेछ। “लोभी मान्छे कसरी दानी बन्छ भन्ने कथा चलचित्रमा प्रस्तुत हुनेछ,” निर्देशक तथा निर्माता माओत्से गुरुङले बताए।
माओत्से गुरुङ फिल्म्सको ब्यानरमा निर्माण हुने चलचित्रको कथा स्वयं निर्देशक गुरुङले लेखेका हुन्। चलचित्रको सम्पूर्ण छायांकन कास्की जिल्लाको पोखरा र वरपरका क्षेत्रहरूमा गरिनेछ। फिल्मका छायाँकारको जिम्मेवारी सुशन प्रजापतिले सम्हाल्नेछन्।
कलाकार, निर्देशक र निर्माता तीनै भूमिका निर्वाह गर्दै आएका गुरुङको यस चलचित्रप्रति दर्शकमाझ उच्च अपेक्षा रहन सक्ने देखिएको छ।
