काठमाडौं । फागुन २१ गते सम्पन्न प्रतिनिधि सभा सदस्य निर्वाचनमा प्रत्यक्षतर्फ प्रतिस्पर्धा गरेका २८९० उम्मेदवारको धरौटी रकम जफत भएको छ। निर्वाचन आयोगका सूचना अधिकारी सुमन घिमिरेका अनुसार यसपटक उम्मेदवारहरूले कानूनअनुसार तोकिएको धरौटी रकम राख्नुपर्ने व्यवस्था गरिएको थियो। निर्वाचन ऐन अनुसार उम्मेदवारले आफ्नो निर्वाचन क्षेत्रमा प्राप्त कुल मतको १० प्रतिशतभन्दा बढी मत प्राप्त गरेमा मात्रै धरौटी रकम फिर्ता पाउन सक्ने प्रावधान छ। यदि १० प्रतिशतभन्दा कम मत प्राप्त भएमा उक्त रकम राज्यको कोषमा जफत हुन्छ।
जफत भएका उम्मेदवारमध्ये ३५० जनाले एक पनि भोट पाएका छैनन्, जसले कतिपय उम्मेदवारले आफ्नै वा परिवारको मतसमेत प्रयोग नगरेको पुष्टि गर्छ। प्रत्यक्षतर्फ प्रतिस्पर्धा गरेका कुल उम्मेदवारमध्ये मात्र ५१६ जनाले आफ्नो धरौटी रकम सुरक्षित गर्न सकेका छन्। उनीहरूले रकम फिर्ता पाउन निर्वाचनको अन्तिम परिणाम सार्वजनिक भएको ९० दिनभित्र निर्वाचन आयोगमा निवेदन दिनुपर्नेछ। आयोगले जनाएको छ कि निवेदन दर्ता भएपछिको प्रक्रिया अनुसार धरौटी रकम फिर्ता गरिनेछ।
