काठमाडौं । जनमत पार्टीका अध्यक्ष सीके राउतले संसदीय राजनीतिबाट सन्यास लिने घोषणा गरेका छन्। राउतले भने, संसदीय राजनीतिक गतिविधिबाट टाढा रहने भए पनि संघर्षको राजनीति निरन्तर जारी रहनेछ। सामाजिक सञ्जालमार्फत सार्वजनिक गर्दै राउतले स्पष्ट पारेका छन् कि उनी संसदीय पदमा नभए पनि पार्टीको एजेन्डा र सिद्धान्तका लागि निरन्तर काम गर्नेछन्। उनका अनुसार, जनताको हितका लागि संघर्ष जारी राख्नु उनीहरूको मुख्य प्राथमिकता हुनेछ।
राउत नेतृत्वको जनमत पार्टी २०७९ सालको प्रतिनिधिसभा र प्रदेशसभा निर्वाचनमा राष्ट्रिय तहमा उदाएको दल हो। उक्त निर्वाचनमा पार्टी राष्ट्रिय दलको दर्जामा पुगेको थियो भने राउत आफैं प्रत्यक्षतर्फ निर्वाचित भएका थिए। समानुपातिकतर्फ थ्रेसहोल्ड हटेपछि पार्टीले थप पाँच सांसद सिट पाएको थियो। तर २०८२ फागुन २१ मा सम्पन्न निर्वाचनमा पार्टीले कुनै पनि सिट जित्न सकेन। सप्तरी–२ बाट प्रतिस्पर्धा गरेका राउत रामजी यादवसँग पराजित भएका थिए। अन्य उम्मेदवारहरूले पनि प्रत्यक्ष र समानुपातिक दुवैतर्फ आवश्यक मत प्राप्त गर्न सकेनन्।
राउतले अब संसदीय राजनीतिबाट अलग रहँदै पार्टीलाई आगामी निर्वाचनका लागि तयार पार्ने काममा केन्द्रित हुने बताएका छन्। उनले आगामी स्थानीय तह र प्रदेशसभा निर्वाचनमा पार्टीलाई सुदृढ बनाउने प्रतिबद्धता व्यक्त गरेका छन्। उनी सधैं जनतामाझ रहने, विभिन्न आन्दोलन तथा संघर्षमा सहभागी हुने र अधिकार तथा पहिचानका मुद्दामा सक्रिय भूमिका खेलिरहने बताएका छन्। राउतले पार्टी अध्यक्ष बन्नु आफ्नो व्यक्तिगत चाहना नभएर बाध्यता भएको पनि बताएका छन्। पार्टी गठनका क्रममा अन्य नेताहरूले अध्यक्ष बन्न अस्वीकार गरेपछि उनले जिम्मेवारी लिएको बताएका छन्।
उनले आफ्नो इच्छा विपरीत दुई पटक संसदीय निर्वाचन लडेका र २०७९ मा विजयी भए पनि पछिल्लो निर्वाचनमा पराजित भएको तथ्य पनि उल्लेख गरेका छन्।
