उदयपुर। उदयपुरको चौदण्डी गढी नगरपालिका–७ स्थित बेल्टार बजारमा भएको आगलागीमा दुई जनाको मृत्यु भएको छ। बेल्टार बजारस्थित लक्ष्मीनारायण खड्काको घरमा आज बिहान आगलागी हुँदा ७० वर्षीय लक्ष्मीनारायण खड्का र ३० वर्षीय पवन खड्काको ज्यान गएको जिल्ला प्रहरी कार्यालय उदयपुरका सूचना अधिकारी निरञ्जन थापाले जानकारी दिए।
प्रहरीका अनुसार आगलागीबाट लक्ष्मीनारायणका छिमेकी रवीन दास र सकल देवका घरमा समेत क्षति पुगेको छ। छिमेकी त्रियुगा नगरपालिका तथा चौदण्डी गढी नगरपालिकाका दमकल, प्रहरी र स्थानीयवासीको सहयोगमा आगो नियन्त्रणमा लिइएको थियो। आगलागीको कारण हालसम्म खुलेको छैन। उक्त घटनाबाट करिब ६६ लाख रुपैयाँ बराबरको भौतिक क्षति भएको प्रहरीले जनाएको छ।
