काठमाडौं, असार ३० — देशभर आज आंशिकदेखि सामान्य बदली रहने तथा विभिन्न स्थानमा वर्षाको सम्भावना रहेको छ। जल तथा मौसम विज्ञान विभागका अनुसार उपल्लो वायुमण्डलमा रहेको पश्चिमी न्यूनचापीय रेखा, स्थानीय वायु तथा पूर्वीय वायुको संयुक्त प्रभावका कारण मौसममा बदली बढेको हो।विभागले आज दिउँसो कोशी प्रदेशसहित देशका हिमाली तथा पहाडी भूभागमा सामान्यतया बदली रहने जनाएको छ। तराईका अधिकांश क्षेत्रमा आंशिक बदली रहने अनुमान गरिएको छ। कोशी, बागमती र गण्डकी प्रदेशका हिमाली तथा पहाडी भूभागका थोरै स्थानमा तथा अन्य प्रदेशका केही स्थानमा मेघगर्जन, चट्याङसहित हल्कादेखि मध्यम वर्षाको सम्भावना रहेको विभागको पूर्वानुमान छ। रातिको समयमा पनि कोशी, बागमती र गण्डकी प्रदेशका पहाडी तथा हिमाली क्षेत्रमा बदली कायम रहनेछ। मधेस प्रदेशसहित अन्य भूभागमा आंशिक बदलीदेखि मौसम सामान्यतया सफा रहने अपेक्षा गरिएको छ। विभागका अनुसार कोशी प्रदेशका एक–दुई स्थानमा भारी वर्षाको समेत सम्भावना रहेकाले सतर्कता अपनाउन आग्रह गरिएको छ। पहाडी क्षेत्रमा चट्याङ, वर्षा तथा सम्भावित पहिरोको जोखिमलाई ध्यानमा राखी आवश्यक सावधानी अपनाउन मौसमविद्ले सुझाव दिएका छन्। यसैबीच, मनसुन सक्रिय बन्दै गएकाले आगामी दिनहरूमा देशका विभिन्न क्षेत्रमा वर्षाको क्रम जारी रहने सम्भावना रहेको मौसमविद्हरूले बताएका छन्
