विराटनगर । शनिबार साँझदेखि लगातार भइरहेको अविरल वर्षाका कारण पूर्वी नेपालका विभिन्न जिल्लामा जनजीवन प्रभावित बनेको छ। बाढी र पहिरोका कारण इलाम, पाँचथर लगायतका स्थानमा सडक अवरुद्ध हुँदा आवागमन पूर्ण रूपमा ठप्प भएको छ।
इलामको सन्दकपुर–३ सुलुबुङ र वडा नं. ५ जोड्ने पुलमा पहिरो खस्दा सडक सम्पर्क टुटेको स्थानीय बासिन्दा प्रतिभा पौडेलले जानकारी दिइन्। पहिरोका कारण आसपासका क्षेत्रमा पनि ठूलो मात्रामा गेग्र्यान (ढुंगा, माटो) झरेको छ।
पाँचथरमा भने बाढी र पहिरोले झनै विकराल अवस्था सिर्जना गरेको छ। मेची राजमार्गअन्तर्गत हेवाखोलामा आएको बाढीले डाइभर्सन तह पार गरेपछि मध्यरातदेखि नै राजमार्ग अवरुद्ध भएको छ। जिल्ला प्रहरी कार्यालय पाँचथरका प्रहरी निरीक्षक रुपेश तामाङका अनुसार, डाइभर्सन नजिकै धमिलो र तीव्र गतीको बाढी बगिरहेका कारण सवारी आवागमन पूर्ण रूपमा ठप्प भएको हो। यस स्थानमा स्थायी पुल बाढीले पटकपटक बगाएपछि तीन वर्षदेखि अस्थायी डाइभर्सनमार्फत यातायात सञ्चालन हुँदै आएको थियो।
यस्तै, तमोर करिडोरमा पर्ने पाँचथर–धनकुटा सिमानाको नावा खोलामा आएको बाढीले पनि सडक पूर्ण रूपमा अवरुद्ध बनाएको छ। राँके–रवि–भेडेटार जोड्ने मुख्य मार्गमा ठाउँठाउँमा पहिरो जाँदा आवागमन असम्भव भएको छ।
मध्यपहाडी लोकमार्गको पाँचथर खण्डअन्तर्गत रिजाल भीरमा खसेको पहिरोले मार्ग अवरुद्ध पारेको छ भने दोभाने खोलामा बनाइएको डाइभर्सनमा पनि बाढीले क्षति पुर्याएको छ।
फिदिम–याङनाम–फालौट खण्डमा पर्ने फेमे खोला र मुवा खोलाका डाइभर्सनहरू बाढीले पुरेका छन्, जसले भारतसँगको सिमानासम्म सवारी आवागमन ठप्प पारेको छ।
अझै खतरा टरिसकेको छैन
लगातार भइरहेको वर्षा आइतबार बिहानसम्म पनि रोकिएको छैन। कतिपय स्थानमा अझै भारी वर्षा भइरहेका कारण पहिरोको जोखिम कायमै रहेको जिल्ला प्रशासन कार्यालय पाँचथरले जनाएको छ। कार्यालयले सूचना जारी गर्दै नागरिकलाई अत्यावश्यक कामबाहेक घर बाहिर ननिस्कन र सतर्क रहन आग्रह गरेको छ।
जल तथा मौसम विज्ञान विभागका अनुसार पूर्वका जिल्ला, मधेश प्रदेश र देशका केही पश्चिमी भागमा समेत आगामी केही दिन भारी वर्षाको सम्भावना रहेको छ। विभागले विशेष गरी सुनसरी, मोरङ, झापा लगायतका जिल्लाका नदी तथा खोलामा जलसतह बढिरहेको भन्दै सतर्कता अपनाउन आग्रह गरेको छ।
प्राकृतिक विपद्का बीच स्थानीय तह, सुरक्षा निकाय र सम्बन्धित निकाय उद्धार तथा राहतको तयारीमा जुटिरहेका छन्। जोखिम कायमै रहेकाले अझै सावधानी अपनाउनु पर्ने अवस्था रहेको स्थानीय प्रशासनले जनाएको छ।
