विराटनगर । जल तथा मौसम विज्ञान विभाग, मौसम पूर्वानुमान महाशाखाले सोमबार दिउँसोसम्म देशभर साधारणतया बदली रहने जनाउँदै विभिन्न प्रदेशका केही स्थानमा मध्यमदेखि भारी वर्षा हुने सम्भावना रहेको जनाएको छ।
महाशाखाका अनुसार हाल मनसुनको न्यून चापीय रेखा सरदर स्थानको आसपासमा अवस्थित छ भने बंगालको खाडीबाट जलवाष्पयुक्त हावाको प्रभाव रहेको छ। यस कारण देशका धेरै भागमा मौसम आंशिकदेखि पूर्ण बदली रहने देखिएको हो।
बागमती, गण्डकी, कर्णाली र सुदूरपश्चिम प्रदेशका पहाडी भू-भागका केही स्थानमा र तराई भू-भागका थोरै स्थानमा मध्यम वर्षा हुन सक्ने अनुमान गरिएको छ। साथै, बागमती र कर्णाली प्रदेशका पहाडी भू-भागका एक–दुई स्थानमा भारी वर्षा हुने सम्भावना रहेको विभागले जनाएको छ।
यस्तै, मधेश, कोशी र लुम्बिनी प्रदेशको तराई भू-भागमा हावाहुरी चल्ने सम्भावनासमेत रहेको पूर्वानुमान गरिएको छ।
महाशाखाले बागमती, गण्डकी र कर्णाली प्रदेशका पहाडी भू-भागमा सम्भावित भारी वर्षाका कारण दैनिक जनजीवन, स्वास्थ्य, सडक तथा हवाई यातायातमा असर पर्न सक्ने भएकाले सतर्कता अपनाउन आग्रह गरेको छ। साथै, पछिल्लो मौसमी सूचनाको नियमित जानकारी लिन समेत सर्वसाधारणलाई अनुरोध गरिएको छ।
