विराटनगर । तनहुँको देवघाट गाउँपालिका–५ मा कुटपिट गरी हत्या गरिएको घटनामा संलग्न रहेको आरोपमा दुई जना पक्राउ परेका छन् । पक्राउ पर्नेमा मकवानपुर हेटौंडा उपमहानगरपालिका–३ घर भई हाल देवघाट गाउँपालिका–५ बस्ने ४२ वर्षीय राम लामा र पाल्पा तानसेन नगरपालिका–८ घर भई सोही ठाउँमा बस्ने २८ वर्षीय बुद्धसारू मगर रहेका छन् ।
इलाका प्रहरी कार्यालय आबुखैरेनी र देवघाट प्रहरी चौकीको संयुक्त टोलीले बिहीबार उनीहरूलाई पक्राउ गरेको हो । घटनामा संलग्न अर्का एक जना व्यक्ति भने फरार रहेको र उनको खोजी भइरहेको जिल्ला प्रहरी कार्यालय तनहुँले जनाएको छ ।
देवघाट गाउँपालिका–५ का ३२ वर्षीय प्रकाश पौडेलको कुटपिटबाट मृत्यु भएको पुष्टि भएको छ । बुधबार साँझ पौडेल आफ्नै घरदेखि करिब ३०० मिटर टाढा लडिरहेको अवस्थामा फेला परेका थिए । गम्भीर घाइते अवस्थामा उद्धार गरी भरतपुर सरकारी अस्पताल लगिएकोमा उपचारका क्रममा बिहीबार उनको मृत्यु भएको हो ।
प्रहरीका अनुसार अनुसन्धानका क्रममा पक्राउ परेका तीन जनाले मादक पदार्थ सेवन गरेर पौडेललाई कुटपिट गरेको खुल्न आएको छ । फरार अभियुक्तको खोजी जारी रहेको र थप अनुसन्धान भइरहेको प्रहरीले जनाएको छ ।
