विराटनगर । विराटनगरका विभिन्न स्थानबाट ठूलो परिमाणको लागुऔषध **खैरो हेरोइन (ब्राउन सुगर)**सहित ४ जना पक्राउ परेका छन्।
पक्राउ पर्नेमा २ जना भारतीय नागरिक पनि छन्। मंगलबार साँझ विराटनगर महानगरपालिका–१३ मा गरिएको चेकजाँचका क्रममा को १४ प ४५८७ नम्बरको मोटरसाइकलमा बसेर कुराकानी गरिरहेका दुई व्यक्तिलाई प्रहरीले शंकास्पद अवस्थामा रोकेको थियो। पक्राउ पर्नेमा विराटनगर–८ का २८ वर्षीय अजयकुमार मुखिया र विराटनगर–१६ का अजयकुमार राउत रहेको मोरङ प्रहरी प्रवक्ता डीएसपी कोपिला चुँडालले जानकारी दिइन्। लागुऔषध नियन्त्रण ब्युरो विराटनगरबाट खटिएको सई प्रकाशचन्द्र अधिकारी नेतृत्वको टोलीले चेकजाँच गर्दा मुखियाको साथबाट १ सय ४० ग्राम १८ मिलिग्राम खैरो हेरोइन बरामद भएको प्रहरीले जनाएको छ।
दुवै जनालाई इलाका प्रहरी कार्यालय रानीको हिरासतमा राखी थप अनुसन्धान अघि बढाइएको छ। त्यस्तै, मंगलबार राति करिब ८ः४५ बजे विराटनगर–११ बसपार्क क्षेत्रमा गरिएको संयुक्त अपरेसनमा दुई भारतीय नागरिक पक्राउ परेका छन्।
भारत बिहार, फारबिसगन्ज कोहलियाका २८ वर्षीय मोहमद मोजाहित र फारबिसगन्ज पलासीका २० वर्षीय राजकुमार दास पक्राउ परेका हुन्। लागुऔषध नियन्त्रण ब्युरोका सई प्रकाशचन्द्र अधिकारी र वडा प्रहरी कार्यालय विराटनगरका इन्स्पेक्टर अप्रिल चापागाईं नेतृत्वको टोलीले चेकजाँच गर्दा मोजाहितले लगाएको जम्परभित्र प्लास्टिकमा पोको पारेर राखिएको १ सय ५२ ग्राम ब्राउन सुगर फेला परेको डीएसपी चुँडालले बताइन्।
पक्राउ परेका दुबै भारतीय नागरिकलाई जिल्ला प्रहरी कार्यालय मोरङमा राखी थप अनुसन्धान अघि बढाइएको प्रहरीले जनाएको छ।
