विराटनगर।देशभर मनसुनी प्रणालीको प्रभाव देखिएको छ। जल तथा मौसम विज्ञान विभाग, मौसम पूर्वानुमान महाशाखाका अनुसार हाल कोशी, मधेश, बागमती, गण्डकी प्रदेशका अधिकांश भू-भाग र लुम्बिनी प्रदेशका पूर्वी क्षेत्रका थोरै भू-भागमा मनसुनी वायुको प्रभाव छ।
त्यस्तै, देशको पश्चिम भागमा पश्चिमी वायु तथा स्थानीय वायुले आंशिक प्रभाव पारेको छ भने भारतको पश्चिम बंगाल आसपासको न्यूनचापिय क्षेत्रको पनि आंशिक प्रभाव नेपालमा देखिएको विभागले जनाएको छ।
हाल देशभर आंशिकदेखि सामान्य बदली रहेको छ। गण्डकी र लुम्बिनी प्रदेशका धेरै स्थानहरूमा मेघगर्जन र चट्याङसहित हल्कादेखि मध्यम वर्षा भइरहेको छ। अन्य प्रदेशका एक-दुई स्थानमा पनि वर्षा भइरहेको जानकारी विभागले दिएको छ।
दिउँसो देशभर आंशिकदेखि सामान्य बदली रहनेछ। देशका पहाडी भू-भागका केही स्थान र अन्य क्षेत्रका थोरै स्थानहरूमा मेघगर्जन र चट्याङसहित हल्कादेखि मध्यम वर्षाको सम्भावना छ। विशेषगरी कोशी, बागमती, गण्डकी र लुम्बिनी प्रदेशका एक-दुई स्थानमा भारी वर्षा हुने सम्भावना रहेको विभागले जनाएको छ।
यस्तै, उच्च पहाडी तथा हिमाली भू-भागका थोरै स्थानमा हल्का वर्षा तथा हिमपातको सम्भावना रहेको छ। कोशी र मधेश प्रदेशका तराई भू-भागमा भने केही स्थानहरूमा हावाहुरी चल्ने सम्भावना छ।
राति पनि देशभर आंशिकदेखि सामान्य बदली रहने छ। पहाडी भू-भागका केही स्थानमा र अन्य थोरै भू-भागमा मेघगर्जनसहित हल्कादेखि मध्यम वर्षाको सम्भावना छ। कोशी, बागमती, गण्डकी र लुम्बिनी प्रदेशका एक-दुई स्थानमा भारी वर्षा हुन सक्ने विभागले जनाएको छ।
उच्च पहाडी तथा हिमाली क्षेत्रका थोरै स्थानहरूमा हल्का वर्षा र हिमपात हुने सम्भावना पनि रहेको छ।
विभागले वर्षाको असरले दैनिक जनजीवन, कृषि, स्वास्थ्य, सडक तथा हवाई यातायातमा असर पार्न सक्ने भएकाले आवश्यक सतर्कता अपनाउन र पूर्वतयारी गर्न आग्रह गरेको छ।
