युक्रेन । युक्रेनका भ्रष्टाचारविरोधी एजेन्सीहरूले राष्ट्रपति भोलोदिमिर जेलेन्स्कीका चिफ अफ स्टाफ एन्ड्री यार्माकको अपार्टमेन्टमा खानतलासी शुरू गरेका छन् । दुई एजेन्सीहरूमध्ये एक भ्रष्टाचारविरोधी ब्युरो ‘नाबु’ ले खानतलासी शुरू गरेको जानकारी दिँदै थप विवरणहरू पछि आउने बताएको बीबीसीले जनाएको छ ।
भ्रष्टाचार काण्डले युक्रेनी राष्ट्रपतिका नजिकका धेरै व्यक्तिहरूलाई घेरेको छ, यद्यपि जेलेन्स्की वा उहाँका दाहिने हात रहेका येर्माकलाई कुनै गलत कामको आरोप लागेको छैन ।
रुसको पूर्णस्तरीय युद्धप्रति युक्रेनको प्रतिक्रियामा येर्माकले महत्त्वपूर्ण भूमिका खेल्नुभएको छ र उहाँ अमेरिकासँगको शान्तिवार्तामा युक्रेनका प्रमुख वार्ताकार हुनुहुन्छ । यद्यपि उहाँलाई पदबाट हटाउन आलोचकहरूले माग गरेका छन् ।
५४ वर्षीय येर्माकले सामाजिक सञ्जालमा नाबु र भ्रष्टाचार विरोधी विशेष अभियोजकको कार्यालय (एसएपी) दुवैले आफ्नो घरमा खानतलासी गरेका पुष्टि गर्नुभएको छ ।
अमेरिकी राष्ट्रपति डोनाल्ड ट्रम्पले शान्ति योजनाको मस्यौदा अगाडि बढाइरहेका बेला अमेरिकी सेना सचिव डान ड्रिस्कोल यस हप्ताको अन्त्यसम्ममा युक्रेन आइपुग्ने भएकाले जेलेन्स्की र उहाँका प्रमुखका लागि यो खानतलासी एकदमै असहज क्षण भएको खबरमा उल्लेख छ ।
यस महिना भ्रष्टाचार काण्डले युक्रेनलाई हल्लाएको छ, अनुसन्धानकर्ताहरूले ऊर्जा क्षेत्रमा भएको भनिएको १०० मिलियन डलरको हिनामिना काण्डमा धेरै प्रमुख सार्वजनिक व्यक्तित्वहरूलाई जोडेका छन् ।
