आज फेब्रुअरी १४ अर्थात् भ्यालेन्टाइन डे विश्वभर प्रेम र सम्बन्धको उत्सवका रूपमा मनाइँदैछ। विशेषगरी युवा पुस्तामाझ लोकप्रिय यो दिन प्रेमी–प्रेमिकाबीच भावना साटासाट गर्ने, उपहार दिने र समय बिताउने अवसरका रूपमा लिइन्छ।
भ्यालेन्टाइन डे को इतिहास तेस्रो शताब्दीका रोमन पादरी सैन्ट भ्यालेन्टाइन सँग जोडिएको मानिन्छ। तत्कालीन रोमन सम्राट क्लाउडियस २ ले सैनिकहरूलाई विवाह गर्न प्रतिबन्ध लगाएपछि सन्त भ्यालेन्टाइनले गोप्य रूपमा विवाह गराइदिएको विश्वास गरिन्छ। त्यसकै कारण उनलाई मृत्युदण्ड दिइएको र पछि उनको सम्झनामा फेब्रुअरी १४ लाई प्रेम दिवसका रूपमा मनाउन थालिएको भनाइ छ।
नेपालमा पनि पछिल्ला वर्षहरूमा भ्यालेन्टाइन डे विशेष उत्साहका साथ मनाउन थालिएको छ। काठमाडौं उपत्यकासहित प्रमुख शहरहरूमा रेस्टुरेन्ट, क्याफे, फूल पसल र उपहार पसलहरूमा चहलपहल बढेको छ। गुलाबको फूल, चकलेट, कार्ड तथा विभिन्न सरप्राइज उपहारको कारोबार उच्च देखिएको व्यवसायीहरू बताउँछन्।
यस दिनलाई केवल प्रेमी–प्रेमिकाको पर्व मात्र नभई, परिवार, साथीभाइ र आफन्तबीच पनि माया साट्ने अवसरका रूपमा लिने चलन बढ्दो छ। सामाजिक सञ्जालमा प्रेम सन्देश, तस्वीर र भिडियो पोस्ट गरेर शुभकामना आदानप्रदान गर्ने क्रम पनि व्यापक बनेको छ।
यद्यपि केही समूहले यसलाई पश्चिमी संस्कृतिको प्रभाव भन्दै आलोचना गर्ने गरेका छन्। तर अधिकांश युवापुस्ताले यसलाई प्रेम, सद्भाव र सकारात्मक भावना अभिव्यक्त गर्ने सुन्दर अवसरका रूपमा हेरेका छन्।
प्रेम, विश्वास र सम्मानले सम्बन्ध बलियो बनाउने विश्वासका साथ आजको दिनलाई सबैले आ–आफ्नो तरिकाले विशेष बनाइरहेका छन्।
