नेकपा (एमाले) का अध्यक्ष केपी शर्मा ओलीले भदौ २३ र २४ गते भएका घटनाहरूलाई वर्तमान राजनीतिक व्यवस्था र संविधानमाथि लक्षित योजनाबद्ध षड्यन्त्र भएको आरोप लगाएका छन्। प्रतिनिधिसभा निर्वाचनका लागि पार्टीको चुनावी घोषणापत्र सार्वजनिक गर्दै उनले मुलुक संवेदनशील राजनीतिक मोडमा पुगेको बताएका हुन्।
ओलीले देश अहिले विवेक र आवेगबीचको संघर्षमा रहेको उल्लेख गर्दै नेपाललाई पुनः अस्थिरताको दिशातर्फ धकेल्ने प्रयास भइरहेको दाबी गरे। भदौ २३ को आन्दोलनमा बाह्य शक्तिको घुसपैठ भएको आरोप लगाउँदै उनले शान्तिपूर्ण रूपमा फर्किन लागेका युवाहरूलाई नियोजित रूपमा निषेधित क्षेत्रतर्फ मोडेर हिंसा भड्काइएको बताए। संवैधानिक प्रक्रियाबाट सरकार परिवर्तन गर्न नसकेपछि सडक आन्दोलनमार्फत प्रणालीलाई नै कमजोर पार्ने प्रयास भएको उनको भनाइ थियो। उनले ती घटनाहरू स्वतःस्फूर्त नभई योजनाअनुसार सञ्चालन गरिएको संकेत गर्दै घटनाको वास्तविक उद्देश्यबारे गम्भीर छानबिन आवश्यक रहेको धारणा राखे।
जेनजी प्रदर्शन र त्यसपछिका राजनीतिक घटनाक्रमप्रति प्रश्न उठाउँदै उनले प्रतिनिधिसभा विघटनसम्म पुग्ने अवस्था रहस्यमय रहेको टिप्पणी गरे। निजी सम्पत्ति, व्यवसायी तथा सुरक्षाकर्मीमाथि आक्रमण गरिनुले आन्दोलनको उद्देश्य प्रस्ट भएको उनले बताए। राजनीतिक अस्थिरताले विकास अवरुद्ध भएको उल्लेख गर्दै ओलीले स्थिर सरकार निर्माण नै अहिलेको मुख्य आवश्यकता रहेको बताए। एमालेसँग विकास र सुशासनको स्पष्ट अनुभव रहेको दाबी गर्दै उनले देश पुनर्निर्माण र जनविश्वास पुनःस्थापित गर्ने जिम्मेवारी आफ्नो पार्टीले लिने बताएका छन्।
अध्यक्ष ओलीले संविधान र राष्ट्रिय सार्वभौमसत्ताको रक्षा गर्न एमाले दृढतापूर्वक उभिने प्रतिबद्धता जनाउँदै आगामी निर्वाचनमा स्थिरता र विकासको पक्षमा निर्णय गर्न मतदातासँग आग्रह गरेका छन्।
