काठमाडौं । गृहमन्त्री सुधन गुरुङले सेयर बजारमा गरिएको आफ्नो लगानीबारे उठेका प्रश्नहरूको जवाफ दिँदै लगानीको स्रोत ऋणमार्फत जुटाइएको स्पष्ट पारेका छन्। उनले बैंकिङ प्रणालीमार्फत भएको सबै आर्थिक कारोबार पारदर्शी हुने भएकाले कुनै पनि रकम लुकाउन सम्भव नभएको दाबी गर्दै आफ्नो लगानी कानुनी र अभिलेखमा आधारित रहेको बताएका छन्। विवादित पृष्ठभूमिका केही व्यवसायीसँग नाम जोडिएपछि पछिल्ला दिनमा मिडिया र सामाजिक सञ्जालमा प्रश्नहरू उठेपछि उनले विस्तृत स्पष्टीकरण सार्वजनिक गरेका हुन्।
गुरुङका अनुसार सेयर बजारमा गरिएको लगानी ऋणबाट जुटाइएको हो र त्यससम्बन्धी लिखित तमसुक २०८० भदौ २९ गते तयार गरिएको छ, जुन अभिलेखमा सुरक्षित रहेको छ। उनले कुनै पनि आर्थिक कारोबार अनुमान वा हल्लाका आधारमा नभई प्रमाणका आधारमा मूल्याङ्कन गर्नुपर्ने बताए। उनले बैंकमार्फत भएको लेनदेन पूर्ण रूपमा ट्रेस गर्न सकिने भएकाले पैसा कहाँबाट आयो र कहाँ गयो भन्ने सबै विवरण स्पष्ट रहने बताए। ‘यस्तो हिसाब हुने पैसा कसरी लुकाउने ?’ भन्ने प्रश्न गर्दै उनले आर्थिक पारदर्शितामाथि उठाइएका आशंका अस्वाभाविक भएको तर्क गरेका छन्।
विवादित व्यवसायीसँग सम्बन्ध र सेयर साझेदारीको आरोपबारे उनले अस्वीकार गर्दै एउटै कम्पनीमा लगानी हुनु मात्रका आधारमा प्रत्यक्ष साझेदारीको अर्थ नलाग्ने स्पष्ट पारे। उनका अनुसार एउटै कम्पनीमा धेरै सेयरधनी हुने भएकाले केवल सेयर खरिदका आधारमा सबैलाई एउटै सम्बन्धमा जोड्नु गलत व्याख्या हो। उनले आफ्नो सम्पत्ति विवरणमा २ करोडभन्दा बढीको सेयर लगानी स्पष्ट रूपमा उल्लेख गरिएको र यो विवरण सार्वजनिक रूपमा उपलब्ध रहेको बताए। यदि केही लुकाउने उद्देश्य हुन्थ्यो भने यस्तो विवरण सार्वजनिक नै नगरिने उनको भनाइ छ।
गुरुङले मन्त्री बन्नुअघि गरिएको सेयर लगानीलाई लिएर उठेका प्रश्नलाई अस्वाभाविक भन्दै सेयर बजारमा लगानी गर्नु कानुनी अपराध नभएको स्पष्ट पारे। उनले सम्पूर्ण कारोबार बैंकिङ प्रणालीमार्फत गरिएको दोहोर्याउँदै अनुसन्धान प्रक्रियामा पूर्ण सहयोग गर्ने प्रतिबद्धता व्यक्त गरे। उनले पार्टीले गर्ने जुनसुकै निर्णय स्वीकार गर्ने र आवश्यक सबै सहयोग उपलब्ध गराउने बताएका छन्। साथै, उनले हल्ला र अनुमानभन्दा प्रमाणमा आधारित बहस आवश्यक रहेको उल्लेख गरेका छन्।
