विराटनगर । सुनसरीको जब्दीस्थित मुरा खोलामा शनिबार दिउँसो पौडी खेल्ने क्रममा दुई बालकको ज्यान गएको छ।
मृत्यु हुनेमा इटहरी उपमहानगरपालिका–१६ का ९ वर्षीय युनिस खत्री र इटहरी–५ का ११ वर्षीय हेमबहादुर (विशु) परियार रहेका छन्।
जिल्ला प्रहरी कार्यालय सुनसरीका प्रवक्ता डीएसपी योगेन्द्र खतिवडाका अनुसार दहमा पौडी खेल्ने क्रममा डुबेका बालकहरूलाई स्थानीय तथा प्रहरी टोलीको सहयोगमा उद्धार गरी इटहरीस्थित सान्वी सिटी अस्पताल पुर्याइएको थियो। तर, उपचारको क्रममा चिकित्सकले दुबै बालकलाई मृत घोषणा गरेका थिए।
हाल घटनासम्बन्धी आवश्यक कानुनी प्रक्रिया पूरा गरी शव परीक्षणका लागि धरानस्थित बीपी कोइराला स्वास्थ्य विज्ञान प्रतिष्ठानमा राखिएको प्रहरीले जनाएको छ।
स्थानीय बासिन्दाहरूका अनुसार उक्त खोलामा गर्मीयाममा बालबालिका पौडी खेल्न जाँदा यस्ता घटनाहरू दोहोरिने गरेका छन्। सुरक्षाको लागि स्थानीय तह तथा अभिभावकको थप जिम्मेवारी आवश्यक देखिएको छ।
