मोरङ । अनलाइन टिभी पत्रकार संघ मोरङको प्रथम अधिवेशनबाट अध्यक्षमा रमेश भण्डारी सर्वसम्मत चयन भएका छन्। मोरङको उर्लाबारीस्थित होटल सेवायोमा सम्पन्न अधिवेशनले भण्डारीको नेतृत्वमा नयाँ कार्यसमिति चयन गरेको हो। नवगठित समितिको उपाध्यक्षमा सङ्गिता कार्की, सचिवमा बिजय धिमाल र कोषाध्यक्षमा देव राई चयन भएका छन्। त्यसैगरी सदस्यहरूमा लक्ष्मीकुमार तामाङ, बिबेक हिङमाङ र मनिता बिश्वकर्मा रहेका छन्। कार्यक्रम मोरङ क्षेत्र नम्बर १ का प्रतिनिधि सभा सदस्य यज्ञमणि न्यौपानेको प्रमुख आतिथ्यतामा सम्पन्न भएको थियो। साथै संचार क्लब नेपालका अध्यक्ष घनश्याम भण्डारी, अनलाइन टिभी पत्रकार संघ प्रदेश नम्बर १ का अध्यक्ष किसोर श्रेष्ठ, कोशी प्रदेश सचिब सरोज बस्नेत,ईलाका प्रहरी कार्यलय उर्लाबारीका प्रहरी निरीक्षक नवीन ओली लगायतको आतिथ्यता रहेको थियो।कार्यक्रमका प्रमुख अतिथि यज्ञमणि
न्यौपानेले अनलाइन पत्रकारिता अहिलेको समयको सबैभन्दा प्रभावकारी सञ्चार माध्यम बन्दै गएको उल्लेख गरे। उनले तथ्यमा आधारित, निष्पक्ष र जिम्मेवार पत्रकारिता आजको आवश्यकता रहेको भन्दै सत्य र प्रमाणमा आधारित समाचार सम्प्रेषण गर्न आग्रह गरे। उनले प्रविधिसँगै पत्रकारिताको दायित्व पनि बढ्दै गएको बताउँदै अनलाइन मिडियाले समाजमा सकारात्मक परिवर्तन ल्याउने गरी भूमिका निर्वाह गर्नुपर्नेमा जोड दिए। साथै, संघको नयाँ नेतृत्वले पत्रकारहरूको हकहित संरक्षण गर्दै व्यावसायिकता र मर्यादित पत्रकारिताको अभ्यासलाई मजबुत बनाउने विश्वास व्यक्त गरे।
