भुटानमा जारी एएफसी २० वर्षमुनीको महिला एशियन कप छनोटमा नेपाली टोलीले हारको सामना गरेको छ।
राजधानी थिम्पूमा हिजो भएको खेलमा नेपाली टोली उत्तर कोरियासंग ११ शुन्यले पराजित भएको हो । खेलको सुरुवातबाट मैदानमा फितलो देखिएको नेपाली टोलीले पहिलो हाफमा पाँच गोल आत्मसात गरेको थियो । त्यसैगरि, दोस्रो हाफमापनि नेपाली टोली मैदानमा कमजोर देखियो । अर्कोतर्फ ५ शुन्यले अग्रता बनाएको कोरियाली टोलीले दोस्रो हाफमा थप ६ गोल गर्न सफल भयो ।
यससंगै समूह ए को तीन खेलमा जित हात पार्दै कोरियाली टोलीले थाइल्याण्डमा हुने २० वर्षमुनीको एशियन कपको लागि स्थान पक्का गरेको छ । यसअघि, कोरियाले घरेलु टोली भुटानलाई १५ शुन्य र साउदी अरबलाई १० शुन्यले पराजित गरेको थियो ।
त्यसैगरि, नेपाली टोलीले पहिलो खेलमा भुटानसंग समान एक गोल गर्दै अंक बाढेको थियो भने, साउदी अरबलाई एक शुन्यले पराजित गरेको थियो ।
