काठमाण्डौ । संयुक्त अरब इमिरेट्स (यूएई) मा चलिरहेको एसीसी पुरुष १९ वर्षमुनिको प्रिमियर कप क्रिकेट प्रतियोगिताको सेमिफाइनलमा नेपालले आज मलेशियासँग खेल्दैछ । खेल अजमान मैदानमा नेपाली समयअनुसार बिहान पाैने ११ बजेदेखि शुरु हुनेछ ।
नेपाल समूह ‘ए’ को र मलेशिया समूह ‘डी’ को विजेताका रूपमा सेमिफाइनलमा पुगेका हुन् । समूह चरणको खेलमा नेपालले लगातार दुई खेल जित्दै सेमिफाइनल पुगेको हो । नेपालले आफ्नो पहिलो खेलमा साउदी अरेबियालाई आठ विकेटले र दोस्रो खेलमा हङ्कङलाई एक सय १९ रनको फराकिलो अन्तरले हराएको थियो ।
आजको खेल जिते नेपाल फाइनलमा पुग्नेछ । समूह ‘ए’ र ‘बी’ मा तीन÷तीन तथा समूह ‘सी र ‘डी’ मा चार÷चार गरी १४ टोलीको सहभागिता रहेको यो प्रतियोगिताबाट फाइनलमा पुग्ने दुई टोली र तेश्रो स्थानमा रहने टोली आउँदो एसीसी १९ वर्षमुनिको एशिया कपमा छनोट हुनेछ ।
१९ वर्षमुनिको एशियन प्रिमियर कपको फाइनल खेल आउँदो सोमवार हुनेछ । १९ वर्षमुनिको एशिया कप आउँदो डिसेम्बरमा यूएईमै हुँदैछ ।
