विराटनगर। नेपाली महिला राष्ट्रिय फुटबल टिमकी कप्तान सावित्रा भण्डारीले नेपाली फुटबलको लिग संरचना अझैसम्म व्यवस्थित र व्यावसायिक नहुँदा महिला फुटबलको विकासमा अवरोध भइरहेको टिप्पणी गरेकी छन्।
उज्वेकिस्तानमा सम्पन्न एएफसी महिला एसियन कप छनोट प्रतियोगिताबाट फर्किएपछि सोमबार त्रिभुवन अन्तर्राष्ट्रिय विमानस्थलमा सञ्चारकर्मीसँग बोल्दै कप्तान सावित्राले नेपाली लिग अझै पनि अव्यवस्थित र अल्पकालीन रहेको स्पष्ट पारिन्।
“एन्फा (अखिल नेपाल फुटबल संघ) अझै पनि पूर्ण प्रोफेसनल रूपमा जान सकेको छैन,” उनले भनिन्, “यदि ६ देखि ८ महिनासम्म चल्ने व्यावसायिक लिग सञ्चालन गर्न सकियो भने महिला फुटबलले अझै धेरै समर्थक र लोकप्रियता पाउन सक्छ।”
उनले विभागीय टिमहरूको योगदानप्रति आभार प्रकट गर्दै एन्फा संरचनामा अन्य क्लबहरू कमजोर भएको औंल्याइन्। “आजसम्मको अवस्था हेर्दा, ती तीनवटा विभागीय टिम (एपीएफ, पुलिस, आर्मी) नभएको भए नेपाली महिला राष्ट्रिय टिमको अस्तित्व नै संकटमा पर्थ्यो भन्ने लाग्छ,” कप्तान सावित्राले भनिन्।
नेपाल महिला राष्ट्रिय टिम सोमबार बिहान उज्वेकिस्तानबाट स्वदेश फर्किएको हो। प्रतियोगितामा नेपालले पहिलो खेलमा लाओसलाई ९–० ले र दोस्रो खेलमा श्रीलंकालाई ८–० ले हराउँदै प्रभावशाली प्रदर्शन गरेको थियो।
तर निर्णायक अन्तिम खेलमा नेपाल घरेलु टोली उज्वेकिस्तानसँग पेनाल्टी सुटआउटमा ४–२ ले पराजित हुँदै प्रतियोगिताबाट बाहिरिएको थियो। निर्धारित ९० मिनेटको खेल ३–३ को बराबरीमा सकिएको थियो।
सावित्राको भनाइले नेपाली महिला फुटबलमा दीर्घकालीन र संरचनात्मक सुधारको खाँचो रहेको स्पष्ट झल्काएको छ।
